政壇：劉夢熊孖鴿仔密斟大計

近來諸事不順嘅全國政協委員劉夢熊，繼連環捲入涉賄及妨礙司法公正案，一度被帶返廉署扣查後，早前更因「個心突然間翳住」忽然入院四日，認真該煨。

但尋日下晝三點鐘，見到劉夢熊現身中環置地廣場一間咖啡店，十五分鐘後就見到白鴿黨嘅立法會議員「單雞」單仲偕匆忙到埗，兩人一見面就握晒手兼坐埋一枱，隨即邊歎咖啡邊密斟。不過，劉夢熊全程似乎有佢講冇人講，講到興起時更好激動咁指手畫腳，單雞坐低唔夠一句鐘亦先行走人，留低劉夢熊負責埋單。

兩個「大纜都扯唔埋」嘅政治人物討論雙普選認真耐人尋味，單雞後來向記者承認的確傾過普選大計，但就點都唔肯透露半句內容，一味話佢哋都好關注普選，更自爆佢哋其實「識於微時」。話說單雞早喺九七年前時任立法局議員嗰陣，已經常就經濟議題向靠買賣空殼公司起家嘅劉夢熊討教，後來亦不時見面，強調見吓朋友冇乜大不了咁話。不過，係咪咁簡單，真係佢哋兩個至知喇！