政壇：貪曾遭前愛將剝牙

人走茶涼，更何況去嘅唔係人，而係「貪曾」前特首曾蔭權爵士？貪曾亂港七年，令樓價狂升，貧富懸殊加劇唔在講，佢任內提出嘅多項重要政策，唔係得把口就係爛尾收場。

貪曾出任特首時話要發展六大產業，其中創新科技同文化產業搞到冇晒影，以內地人同雙非兒童為對象嘅醫療同教育產業更加搞到一鑊泡，令大批本地孕婦無床位生仔、本地學生要跨區上堂，真係無良。因此特首ＣＹ梁振英喺上月發表嘅施政報告，正式宣告將醫療同教育剔出六大產業，強調要優先照顧本地市民需要，明摑貪曾一巴。

扶貧政策諗縮數

貪曾拒絕承認香港有貧窮問題，唔肯大幅動用公帑扶貧，反而諗縮數設立一百億元官商配對關愛基金，幻想由政府同商界各出一半錢扶貧，並順道為出任基金督導委員會主席嘅前政務司司長唐唐競選特首鋪路。點知商界對貪曾呢種擺明屈錢嘅做法反應冷淡，至今只承諾捐出約十八億元，唔夠原來目標嘅一半，其後唐英年因爆出連串醜聞落選，商界更加一毫子都唔肯再捐。為免基金乾塘令佢哋幫開嘅N無人士斷水斷糧，財爺鬍鬚曾惟有喺尋日新政府嘅預算案宣布向基金注資百五億元公帑，變相終止再向商界籌款嘅計劃，反證貪曾當年構思不切實際。

佢喺○七年競選連任時承諾推行醫療融資改革，並喺庫房預留五百億元撥款，作為將來供款計劃嘅種子基金，但最後佢同食物及衞生局前局長周一嶽提倡嘅供款方案，因不獲市民同保險界認同而爛尾，到貪曾落台時都提唔出新方案，又要CY同新任食衞局局長高永文執手尾。由於新方案好可能會改為自願醫保計劃，所需嘅公帑撥款唔使五百億咁多，有份制訂預算案嘅政府消息人士尋日就預告，稍後可能會將該五百億元「解凍」，用於其他醫療開支或預留作津貼自願醫保，變相幫貪曾剝晒棚牙！睇怕佢都估唔到操刀嘅係佢嘅前愛將鬍鬚曾，真係折墮囉！