市民玩過都話驚

【本報訊】不少港人關注埃及熱氣球爆炸事故，昨在電台節目批評坐熱氣球很危險，因旅行社無說明危險性，亦無核實保單是否涵蓋行程活動。兩年前曾到埃及樂蜀旅遊的李先生稱，曾自費乘坐熱氣球，體驗到「從死亡走番落嚟！」原訂四十五分鐘的行程，變為一個多小時，「升到上天啲風愈來愈大，吹到過埋尼羅河，個控制員好擔心，飛到去塊田，想降落又撞番起，彈來彈去！」

馮先生曾在土耳其坐熱氣球，事前旅行社無提及風險與保險問題，收費為二百六十美元（約二千港元）：「個熱氣球坐咗三十多人，逼到轉身都唔得，氣球穿咗都照飛！」他又指正常降落程序應有車於降落點等候，以繩索扣到車身協助氣球停下：「如果見唔到架車，即係（熱）氣球已經失控。」

轟旅行社說明不足

張太表示，曾光顧旅行社到伊朗，旅程期間相機損壞，回港始獲告知伊朗屬保單不受保障國家：「我畀（錢）旅行社嗰陣，都話冇問題，佢哋做咗咁多年，某啲保險公司去伊朗唔賠，到底唔知定係唔理？」她認為若團員的旅遊保險不保障部分行程，旅行社應提醒旅客。