SUN搞作：打橫嚟講：點解政府出辣招遏樓市

香港政府為遏止樓市泡沫亢奮，失驚無神，突然作出「非常化」的增加雙倍印花稅，並揚言，若辣招成效不彰，「不排除」仲有更辣的絕招陸續出台。

看起來，香港政府好似好想「穩定樓市」，誓在泡沫爆破前，做定防禦工夫，免卻日後美國帶頭加息時，香港樓價下滑而出現的危機，所以，現及早出招阻一阻香港人買樓（尤其是那些唔係好夠錢買樓，但人買佢又買的羊群買家），算是為大家好的德政！

表面上，財政司司長曾俊華出招壓抑樓市炒風，像是理所當然之事，但細思事件背後，又唔係好妥啫！

香港政府放風話為港人買家着想，令大家「暫停」入市，咁香港樓價就真係會下調嗎？信嘅！就白癡囉！依家好多經濟學者、投資專家都攞出數據話短期內會少咗人入市。嘿！短期囉！過多兩個星期，曾俊華讀完財政預算後，咪大翻身回穩飆升。嗱！家陣樓市買賣交投少啫！樓價哪有下降呢？尤其是啲貴價樓，此現象乃因豪宅市場，一直係內地大陸人的臠肉，只要佢哋的政法不彰，一日有貪污，那些毋須辛勞血汗積儲回來的黑錢，就必須逃離境外「洗」出去，香港特區這大型洗白白的避風港，怎避得了！

香港本土人唔買樓，只會讓大陸資金逐步入侵及佔據，有利大陸「和諧」香港。香港政府的一舉一動，都是忠心愛國的表現。香港，只是九官攀升的踏腳石！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊（目及）實政府