SUN搞作：少膽虫手記：肥都要跑

少膽虫其實唔歧視肥人，亦都唔敢歧視。講真，唔係多得肥佬黎，憑住少膽虫呢啲三腳貓功夫，又點可以做到《爛果》老總？

近排興跑馬拉松，肥佬黎成日都話我哋呢啲編輯一日到黑屈喺公司對住左手同右手太唔健康，所以之前已經幫我哋報晒名。少膽虫仲記得，嗰日入到淫黎辦公室，佢已經換晒一身健兒裝束，啲肥肉彈吓彈吓，少膽虫見到淫黎胸前兩團肥肉，一時之間竟然分唔到到底佢是男是女。

「虫，我已經幫全公司上下，上至老總下至負責揸車數人頭嘅司機，都報晒名參加今屆馬拉松。」淫黎一邊拉筋壓腿，一邊同我講。我望住淫黎成個波咁彈吓彈吓，好想笑但又笑唔出，亦都為自己擔心。我哋呢啲編輯，平時唔做運動，晚晚三更半夜食消夜，除咗間唔中北上伸展吓條腰骨，真係無咩活動。

依家一係唔嚟，一嚟就跑馬拉松，唔通真係要叫同事準備定個版位畀我？

「虫，我已經決定親身上陣，仲搵埋你、肥豪同肥仔明一齊跑，我哋今次上位嘞！」肥豪大家應該唔會陌生，至於肥仔明呢，就係近期最新嘅紅人，少膽虫早排見佢日日着住條低到見到屁股嘅褲行入淫黎辦公室，過一排就升咗做Ａ１編輯嘞。依家連跑馬拉松都預埋佢添。

尋日比賽，我哋依個「三肥一蟲」嘅組合，真係威震全場，少膽虫全程跟住呢三團肥肉，根本跑都唔使跑，行吓行吓就夠鐘坐車。少膽虫望住口吐白沫，面都青晒上氣唔接下氣嘅肥豪同肥仔明，正諗緊點安慰淫黎，點知佢笑笑口咁講：「虫，下年我哋再跑過！嗱，今年我哋已經係傳媒界最快！」

環顧全場，好似得我哋用傳媒名義出賽咋喎，淫黎咁都可以自我感覺良好，霸個山頭話自己係傳媒第一，真係吹脹囉。