政壇：政商定格：高永文盡責盆菜宴把關

前民政事務局常秘、「媽打」李麗娟係瑪利諾修院學校嘅超級校友，每次為學校籌款都超額完成。昨日趁元宵佳節，媽打又出錢出力，聯同舊生會及學校嘅教育基金，喺中學部舉行珍寶滿盆宴，筵開五十圍，籌得六十萬元，為今年八十八歲嘅瑪利諾再獻一分力。

主禮嘉賓係食衞局局長高永文，呢個民望高嘅局長帶埋太太出席，仲喺席間滿場飛，四圍巡時相當搞笑，不忘盡局長職責，提醒大家盆菜要翻熱夠至可以食。媽打未退休前已與高醫生工作上相當合拍，由佢哋嘅稱謂就可以睇出，一般人都係稱高永文「醫生」、「局長」，工作拍檔叫聲「阿高」。媽打就特別親暱，嗌「永文」。