政壇：搞搞政：陳恒鑌早年不識劉江華

政圈關係好多時盤根錯節，民建聯立法會新丁議員陳恒鑌（阿Ben）尋日就自爆，讀大學嗰陣已經同現時貴為副局嘅劉江華交手，話說佢當年幫時事學會安排論壇嘉賓，民主派有劉慧卿助陣，建制派只得劉江華一人應戰，當時做搞手嘅阿Ben竟然唔識邊個係劉江華，待見識過劉江華嘅辯才後，先知自己有眼不識泰山。

九十年代喺科大讀機械工程嘅阿Ben話，自己當時唔只對機器有興趣，連對政治都有濃厚興趣，所以一心諗住搞場星級政治人物論壇，點知建制派冇派曾鈺成等政壇老手出戰，而係派出劉江華，阿Ben一度感到冇癮，因為佢當年連聽都未聽過劉江華呢個名。

阿Ben好老實話，當年劉江華未加入民建聯，所以唔識佢，估唔到劉江華一開口，佢已經被對方嘅雄辯滔滔口才吸引。其實，當年劉江華以公民力量身份參選，已經雄霸沙田一方，只係去到九八年，先至做到立法會議員，喺當時嘅政壇絕唔算無名小卒喇，只係當年嘅阿Ben漏咗眼啫。