政壇：黃錦星帶團訪韓睇垃圾

環境局局長黃錦星上任未夠八個月，先後就垃圾徵費同玻璃樽生產徵費展開諮詢。為咗參考其他國家嘅減廢經驗，佢同立法會環境事務委員會部分議員四月頭去南韓首爾考察四日，了解當地管理廢物嘅經驗，今次出行四日行程密麻麻外，黃錦星仲要啲議員早啲起身，睇吓平時首爾居民倒垃圾嘅情況。

立法會每屆都會以考察外地立法機關為名頻頻派代表團出埠，唔少行程都養尊處優，返港後靠秘書處出新聞稿同整份二十幾頁嘅報告就算，因此惹嚟一啲公費旅遊嘅質疑。不過今趟首爾之旅似乎唔多梳乎，抵達之後翌日朝早六點幾鐘，黃錦星就會率領一眾議員觀摩首爾居民倒垃圾嘅情況，順手考察住宅同商業樓宇嘅廚餘收集情況。

有議員仲話，為咗嚴格遵守立法會外訪規定，所有議員搭飛機都要坐經濟客位，而住宿方面就會盡量安排同環境局住喺同一間酒店喎。