政壇：長毛與蘭桂坊劃清界線

政府早排喺施政報告提出加強取締濫用公屋嘅富戶，房屋署年初更向社民連立法會議員梁國雄（長毛）「開刀」，審查佢嘅入息及資產係咪仲合乎資格上限，雖然長毛最終成功過關，但亦逃唔過同行嘅狙擊。成眾矢之的嘅長毛頓時無名火起，澄清自己「一年去蘭桂坊五次都冇」，部車亦係畀社民連作日常之用，自己平時出入都要靠公共交通工具代步。

金融界議員吳亮星日前喺立法會大會上，暗嘲部分月入七、八萬元嘅市民都霸住公屋賴死唔走，更有議員揶揄部分人成日落蘭桂坊兼揸靚車仲住公屋，似乎意有所指，長毛火冒三丈澄清，自己「一年去蘭桂坊五次都冇」，所以大家亦唔使再喺蘭桂坊尋找長毛嘅蹤迹喇。

平時最叻笑笑口四両撥千斤嘅長毛今次咁火滾，足見件事拮到入肉。又係嘅，佢呢頭做尊貴嘅議員，嗰頭又霸住基層公屋，市民好難冇睇法o架。