政壇：波波唔畀人瞓天橋底

新一屆政府話要寸土必爭，打晒鑼咁搵地起樓，紓緩樓市緊張，最近城中焦點話題就係天橋底嘅發展空間，事關工聯會陳婉嫻前排見梁振英政府全民覓地咁頭痕，就拉埋胡恩威同中大建築系副教授鄭炳鴻組成「天橋底行動」，仲拋咗一啲建議，尋日發展局局長陳茂波喺網誌上談及佢對天橋底發展嘅睇法，擺明姿態唔接受天橋底發展與居住有關嘅項目，封晒大門，至於天橋底做寫字樓、表演場地就獲另眼相看！

其他用途另計

當日嫻姐佢哋話，只要政府喺天橋底放番幾個貨櫃，咁天橋底都可以變身做臨屋區，城市花園都有佢份。建議一出，惹嚟唔少網民批評，話佢涼薄要人瞓天橋底，正頭痕覓地嘅波波尋日都似乎唔多領情，尋日喺網誌問：「齊齊去瞓天橋底？」

波波喺網誌中話，雖然政府覓地建屋過程唔容易，但亦唔會為求達建屋目標，而忽略土地係咪合適，計劃係咪實際可行，局方喺改變土地規劃時會考慮一系列相關因素，務求唔會為社區帶來負面影響。佢唔否認天橋底用地可多加善用，仲話事實上唔少非政府機構都將辦公室設於天橋底，例如銅鑼灣堅拿道天橋底有香港各界婦女聯會協進會，而中環纜車徑橋底就有世界自然基金會香港分會辦事處，而香港建築中心就正向政府申請，喺上環干諾道中天橋底興建總部，申請正有待地政總署審批。

不過凡事都有個譜，講到天橋底做居住用途，佢就好明確咁話，政府喺規劃天橋底嘅時候亦需依從《香港規劃標準與準則》規定，基於安全及環境因素，熟食檔、住宿、日間護理服務中心等就屬於「不可接受」嘅天橋底用途。換言之，嫻姐嘅建議明顯唔多啱規矩。