箍牙減食助瘦身得啖笑

【本報訊】少女爭相戴上假牙箍，除為緊貼潮流，部分人還希望達致瘦身效果。她們以為戴上假牙箍可減低食欲，過往亦有不少人相信，透過箍牙可向顎部施加壓力，令牙齒酸軟從而影響胃口，但有矯齒專家指出，縱然牙箍會致飲食困難，惟影響短暫，至今亦無研究證明箍牙與體重下降有關。

部分潮戴假牙箍的東南亞年輕人以為，戴上假牙箍難免感到不舒服，「食嘢都食少啲」，以為潮得起又減到肥。但原來這想法純是謬誤，「通常都係箍牙頭幾日，同埋覆診後幾日，先會覺得啲牙冇力，但習慣咗就會回復正常。」香港矯齒學會秘書陳鎮揚表示，箍牙確實會令牙齒酸軟導致飲食困難，但影響只屬暫時性。

他補充，現時箍牙技術比以往進步，所採用的牙箍軟度較高，造成的拉力亦較小，對進食不會構成太大影響。