廉署執法懶懶閒 調查貪曾歎慢板

講大話，甩大牙。曾蔭權爵士貪威識食，食相難睇係人都知，原來佢有樣嘢仲叻，就係擘大眼講大話，大家不妨睇吓佢究竟會唔會甩大牙。

貪曾夫婦去年二月被東方報業集團踢爆不避嫌與多名本地富豪暢遊澳門，眾人以豪華遊艇作行宮，度過三日兩夜豪華之旅，之後貪曾又乘坐星島新聞集團主席何柱國私人遊艇回港。事件曝光後，佢聲稱向船主支付咗五百元船費。事實又係點嘅呢？海事處經過一年調查，證實有關船東或船長根本冇收取任何費用，即係話，貪曾擘大眼講大話！

呢，早前向廉政公署舉報貪曾嘅市民莊先生，得悉所謂支付船費純屬一派胡言之後，認為貪曾誠信破產，日前趁貪腐醜聞曝光一周年，再向廉署舉報貪曾涉嫌收受利益，同時亦舉報前廉政專員湯顯明在任時包庇貪曾。消息指，廉署已就貪曾懷疑冇畀船費一事立案調查，至於涉及湯顯明嘅舉報就唔立案喎。

其實，無論貪曾有冇畀船費，佢都走唔甩o架。按照法例，私人遊艇唔可以收錢載客，如果貪曾有畀錢，即係有人涉嫌以「白牌船」非法載客；如果貪曾冇畀錢，除咗講大話，仲涉及收受富豪利益，今鋪仲唔斷到正！

至於湯顯明有無包庇貪曾，大家有眼睇，狡辯都冇用。湯顯明係貪曾一手安插入廉署，○九年已屆六十歲退休之齡仍獲續約三年，直到一二年六月底至與貪曾一齊離任，如果話當中冇蠱惑，細路仔都唔信喇。呢嗱，有人舉報湯顯明任內以權謀私五宗罪，包括經常大花筒以公帑豪華外訪、唔依程序招聘內地學者擔任合約顧問等等，簡直係上樑不正下樑歪，同貪曾一擔擔。唔怪得舉報人莊先生咁扯火喇，貪曾醜聞令香港廉潔形象嚴重受損，廉潔指數世界排名一跌再跌，而廉署查案居然慢過龜爬，事隔一年仲係毫無寸進，唔嬲至奇。

更奇嘅係，盡好市民責任嘅莊先生，近日竟然接連收到匿名電話恐嚇及滋擾。喂，唔係話「香港勝在有你同ICAC」嘅咩，廉署口口聲聲保證舉報人安全，依家莊先生受到白色恐怖威脅，條數點計先？唔通市民舉報貪污都有罪？唔通香港真係冇王法？

無論點都好喇，貪曾已經滾蛋，湯顯明亦已執包袱，唔該廉署撥亂反正，依法辦事，盡快處理貪曾案，千祈唔好自毀招牌呀。內地強調老虎同蒼蠅一齊打，香港又點能例外吖，叮！