SUN搞作：打橫嚟講：出謀獻策為香港，好過鬧人

那個與特首對着幹的大少爺，有人對佢愈睇愈唔順超，除咗佢反對香港政府計劃限制大陸旅行團人數訪港之外，最頂佢唔住，就係佢公然「講真話」咁款大叫：「你個位係呃番嚟嘅！」之後，最近又說：「商界中人認為梁振英冇．料．到」，兼指叻人係唔會幫渣人手嘅咁話，即明剃眼眉也！

唔知梁先生有無養狗，若無，咁就真係無狗用咯！否則，派隻狗去咬春佢啦！等佢唔好久唔久便出嚟說三道四、興風作浪，搞串party！篤到應啦！

特首話佢一心想做實事o架！佢手下的猛將已四出搵地起樓，欲做點成績畀阿爺睇o架！否則，唔使失驚無神搶奪浸會大學半塊地，又唔使花耗天大人力物力話去填一個人工島增大香港面積啦！

家陣，石礦場、荒置校園、舊區皆被見縫插針的，已不在話下，連地底岩洞都唔放過啦！可見高官幾咁落力去開拓土地供應呢！

雖然，上述嗰班高薪厚祿嘅渣斗庸才，已用盡腦汁，但真係冇乜料到喎！嗱！我唔收錢，盡小市民責任，為社會出分力，畀兩條橋梁班子啦！

以前，英國佬管治時，喺新界霸咗好多靚地起行宮，話乜Ｑ司長別墅，實則，一年都用唔到三次，倒不如攞晒出嚟用，好過工聯會陳婉嫻大嬸叫人瞓天橋底咁刻薄吖！

另外，反正駐港解放軍又唔會開坦克出嚟車人民嘅，啲軍營就無需要瞓咁多人啦！不如「釋放」啲土地出嚟吧！

呢兩條橋起碼唔擾民，仲有身先士卒的能事！正哩！隨便攞去使，唔夠我仲有橋！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府