政壇：政商定格：鄭斯燦起公司名靠睇戲

半新股卡撒天嬌起用充滿女性化嘅英文名Casablanca，集團副主席鄭斯燦都話，靈感源自奧斯卡得獎嘅經典美國電影《北非諜影》（英譯名Casablanca）。

佢話九三年同大哥鄭斯堅創作公司名時，都有諗過Dreamate（中譯為夢邊人）等，但最終都係覺得Casablanca較女性化，而且電影兼主題曲都夠深入民心。至於中文名嘅由來，係當年有朋友贏馬，而馬名就係卡薩天驕，所以攞個意頭加啲創意就咁成事。卡撒天嬌喺香港出世，然後勇闖內地，至今已十年，今年內地新廠一期項目又正式投產，會出乜嘢招乘勝追擊？鄭斯燦就大賣關子，淨係話好欣賞鐵達時「100年之約」嘅感人故事，今年三月會開始拍攝一個關於「愛生活、愛未來」嘅微電影，由北京名導演執導，希望到時吸引到更多人留意公司產品背後嘅文化，現階段就未有產品代言人嘅心水。