政壇：政商定格：周沁西九練跑蛇年開運

呢排大家都忙於拜年，但喺年初七「人日」早上，竟然喺西九龍海濱長廊見到香港青年聯會賢慧社主席Anthea羅詠詩同副主席Dorothy周沁着晒運動裝，沿住海邊嘅跑步徑跑步，當係農曆新年行大運。

Anthea話運動係美容嘅靈丹妙藥，有益身心之餘，仲可以增進友誼，所以佢成日都約埋Dorothy一齊練跑，唔怪得佢哋經常都咁容光煥發喇！有時佢哋運動過後，仲會順便去歎番個brunch（早午餐），享受一吓假日嘅休閒，兼商討吓賢慧社嘅會務發展，一舉兩得。賢慧社將於年中換屆，Dorothy會接棒做主席，Anthea笑言，一定會瞓身支持好姊妹喎！