政壇：搞搞政：漏招過惡法泛民爭補鑊

喺上屆立法會臨收爐前通過嘅《公司條例》被揭內藏魔鬼細節，有條文禁止包括傳媒在內嘅公眾人士查閱公司董事住址同完整身份證號碼，當日有份舉手通過惡法嘅議員被轟集體漏招放生「魔鬼」，而大部分來自法律界嘅泛民主派議員更加難辭其咎。

《公司條例》附屬法例小組委員會最新名單入面，上屆有份漏招嘅公文袋湯家驊、白鴿黨「鐵頭仁」何俊仁同涂謹申都有加入，其中泛民成員更由四個增至七個，而建制派亦冧友入委員會。

仲記得幾位大狀當年審議有關草案時不但走漏眼任由條例通過，有時更連會都懶得開，其中鐵頭仁同涂謹申更喺四次關鍵會議中缺席咗兩次會議，湯家驊則遲到早退兼唔出聲，唔怪得睇唔到啲魔鬼條文啦！最離譜係佢哋事後仲喺度批評，依家先嚟補鑊，只可惜主體法例已通過，爭取喺附屬法例加入豁免條款只係修修補補、賊過興兵。

不過，最好笑嘅係，關乎限制查冊嘅惡法其實五月先提交立會，各位議員咁早就蜂擁加入委員會，諗住盡快補鑊，似乎係表錯情囉！