政壇：曼聯飛渴市林健鋒冇計

英超勁旅曼聯暑假來港獻技，但四萬張門票只得一萬八千張係公開發售，其餘門票被唔同機構留起晒，惹起全城撲飛熱潮。

稱唔負責門票發放

由於今次曼聯來港獲盛事基金撥款八百萬元資助，搞到盛事基金主席林健鋒成為眾矢之的，點知佢話門票發放係球隊「傑志」負責，佢身為主禮嘉賓都係得自己一張門票，所以朋友問佢有冇免費飛，佢都無能為力。

林健鋒話一萬八千張門票喺香港公開發售，呢個數字已比大球場同級別賽事為高，而且其餘門票亦係公開發售，只不過唔係賣畀香港市民，例如部分門票就留畀旅遊發展局，另外部分門票留畀曼聯賣畀海外球迷，仲有部分門票留畀本地球圈。

今次另一為人詬病係公開發售門票全部係山頂位，靚位就被人內部認購晒，佢就話呢方面佢都控制唔到，真係愛莫能助。不過，盛事基金有權監管曼聯有冇派精兵落場，如果曼聯只係派後備應酬球迷，盛事基金可能扣除部分贊助。