政壇：唐媽媽避講新抱兜路走

仁濟醫院董事局尋日舉行新春酒會，數以百計政商界名人齊聚首，包括前政務司司長唐英年母親唐尤淑圻。悉心打扮嘅唐媽媽心情勁靚，事關佢喺外國居住嘅子女都返香港過農曆新年。不過，問起佢新抱、唐唐老婆郭妤淺因僭建被起訴，唐媽媽即刻收起笑容，連聲話唔知，離去時仲喺工作人員護送下，兜路避過記者迷陣，同以前出聲力撐阿仔嘅態度截然不同。

開心阿仔做政協常委

唐媽媽係仁濟顧問局主席，對仁濟活動一向瞓身支持，但近年唐家是非多多，唐唐又神出鬼沒，傳媒惟有追住經常出席公開場合嘅唐媽媽。佢透露，今個農曆新年，唐唐都一齊留港團年，幾日前先至出門去旅行，對於阿仔有望當選全國政協常委，唐媽媽坦言好開心。