政壇：「吳得掂」笑爆立會

教育局局長吳克儉為官半年風波纏身，先有舊年八月因推行德育及國民教育科而搞到一鑊泡，之後又有中學減派同浸大地皮爭議等問題，真係鑊鑊新鮮鑊鑊甘，忙到氣咳都搞唔掂。由於局長嘅工作能力認真麻麻，外界就幫佢改咗個花名叫「吳得掂」，諷刺佢瓣瓣都唔掂，之後唔少人都攞吳局長呢個花名嚟開玩笑。

話說立法會尋日討論會唔會對宣傳免入息審核借貸廣告作出監管，唔少議員鬧爆有財務公司喺電視大賣廣告，用「借得易還得易」等噱頭吸引後生仔借錢周轉，叫財經事務及庫務局局長「傻強」陳家強諗計規管電視廣告，等啲後生仔唔好誤墮法網。

被阿王火球辣中

但「阿王」王國興就建議政府先行一步，喺規管電視廣告前製作番啲廣告節目教後生仔唔好隨便借錢。佢話當局現時啲宣傳橋段唔係好得，又話宣傳最緊要就係「創意」兩個字，仲幫傻強諗咗句口號：「先使未來錢，將來唔得掂」，仲話呢個口號既簡單又易記喎。

「唔得掂」同「吳得掂」讀音相若，即刻令人聯想到吳克儉喇！本來火球係撞向傻強嘅，點知冇喇喇辣埋吳克儉添！

好彩，阿王都驚有人會由「將來唔得掂」聯想到吳局長，佢於是特別澄清自己絕無冒犯吳局長之意，費事大家以為佢都想笑埋局長一份。

不過，聽到阿王用吳克儉嘅花名作出如此佳作，傻強惟有以笑遮醜咁話如果地區議員配合政府工作，相信宣傳效果一定會事半功倍喎！