改裝氣槍零難度 市民生命零保障

危險危險！槍械氾濫，出入小心啊！

太一叮唔係講緊打內戰嘅敍利亞，亦唔係講緊頻頻發生槍擊案嘅美國，而係大家身處嘅香港地。今時今日，違規改裝氣槍嘅情況愈來愈嚴重，殺傷力愈來愈大，不法之徒攞住啲改裝過嘅氣槍周圍亂咁射，真係好牙煙o架。

呢，最近香港接連發生多宗氣槍狙擊案，呢頭有學生中招，嗰頭有小巴被射爆車窗。上月底之嘛，一位天水圍少女放工返屋企，行行下被氣槍鉛彈射入鎖骨兩吋，無辜辜要開刀攞番出來。有專家分析多宗事件，認為涉事氣槍經過違法改裝，威力隨時超過五焦耳，遠遠高過法例規定嘅兩焦耳上限，萬一射中車胎，隨時導致車禍，萬一射中行人頭部，即時無命都似。狂徒傷人取樂，簡直喪心病狂，叮！

最得人驚嘅係，查實呢類違規改裝嘅「超級氣槍」周街都有。本報記者放蛇發現，唔少氣槍店都會私下幫顧客改槍，網上亦有大量教改裝氣槍嘅短片，只要狂徒照辦煮碗，提升氣槍「火力」可以話係零難度，而市民嘅生命安全可以話係零保障。

講來講去，氣槍之所以變成傷人兇器都係官僚誤事。一直以來，港府雖然嚴格管制真槍實彈，但對同樣具殺傷力嘅氣槍就隻眼開隻眼閉，結果一個狂徒得逞，其他狂徒有樣學樣，傷人事件想唔遍地開花都幾難！

官僚敷衍塞責，後果不堪設想。有警務人員透露，當局容許入口嘅氣槍仿真度愈嚟愈高，部分仿真度甚至高達九成九，真假難辨。如果當局繼續縱容違規改裝嘅氣槍通街走，難保唔會有狂徒魚目混珠帶支真槍出街，呯呯嘭嘭，隨時釀成美國校園槍擊案翻版都有之！

有立法會議員就講得啱，氣槍傷人事件接二連三，反映改槍已到失控地步，亦證明現時規管氣槍嘅法例過於寬鬆，已經不合時宜。當局應該檢討法例，全面取締高性能氣槍，並將改槍列為刑事罪行，提升阻嚇力。吸取槍擊案教訓，家陣美國政府都話要收緊槍械管制啦，港府連氣槍都無辦法管好，好落後啫。

一句到尾，改裝氣槍零難度，市民生命零保障，好心港產官僚加多兩錢肉緊，加強規管啦。槍械呢家嘢唔講得笑o架，正如毛澤東話齋，「槍桿子裏面出政權」，港府繼續闊佬懶理，遲早搞到通街軍火都有之，到時先知驚就遲啦，叮！