SUN搞作：打橫嚟講：廢墟下的旅遊業議會

今天，香港廢柴政府之廢，已去到唔死都無Q用之地步，首先，那個香江第一大貪官仆街粉皮煲呔，被海事處指證講大話無畀錢搭船，證據確鑿，雙規到痹，我哋都唔明點解仲未見政府有人做嘢，「塔」叉佢受靶？跟住，嗰啲講到好兇狠嘅乜春SSD（額外印花稅）、BSD（買家印花稅），家陣，畀大地產商當「碌銀」咁掃埋床下底，「雙辣招」？食蕉啦！再嚟！仲PK，就係連下三濫嘅地痞旅行社都唔將呢個廢柴政府放在眼內，明剃眼眉，又如何？

那間名叫「世通假期」的旅行社，新春期間接待大陸團的醜態，令香港旅遊業蒙羞及其荒謬，除該旅行社須負全盤責任外，香港政府辦事的能力，亦核突失敗到嘔！

「世通」安排的新春大陸團，接二連三「瞓巴士」、「fa跳海郵輪」、「七個人瞓一間房」（仲要係扑嘢用嘅時鐘炮房）、「無地方落腳，要團友提早返鄉下」……咁惡劣嘅情況下，香港旅遊業議會好有嘢咁飭令要「世通」持牌人出嚟解畫，點知，人家睬你哋生臭狐，係唔蒲頭呀！吹BB咩！

又係嘅！呢個旅議會殘缺得叫人咋舌，佢哋早前大鑼大鼓喝斥「世通」持牌人要擒日（星期二）出現交代，否則，不排除「釘牌」，係威係勢，好嘞！再次影都無隻後，旅議會又話真係「好憤怒」、「不能接受」……並說，畀多次「最後通牒」到聽日（星期四）。唉！去死啦！廢柴！

香港人看到自己生活在一個廢墟上，如何會活得愉快呢？

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊（目及）實政府