SUN搞作：少膽虫手記：大起大落

「I love賣 country，you don't！」少膽虫仲以為係激進建制派踩上《爛果》。點知睇真啲，只見淫賤黎掟咗部電話落地，氣沖沖咁走出嚟。少膽虫多口問句：「出咗事呀老細？」佢即刻彈番句：「So what？我唔係畀你喺度審問o架！」少膽虫當堂咩都唔敢講，唔使爭住話邊個係coward喇，少膽虫自動鞠躬say sorry。淫賤黎唔收貨：「你唔適合做老腫，做番記者啦。」

少膽虫晴天霹靂。想當年臭鞋擦盡，背脊篤遍，就係為坐正老腫。做記者仔？字都唔識打呀！但係無計，點都要頂硬上。第一單嘢就要少膽虫放蛇報道，仲要做「雞虫」！少膽虫硬住頭皮去，企喺門外掙扎良久，唔好以為我有咩包袱，亦唔係驚應門嘅外貌太嚇人，少膽虫只係擔心淫賤黎咁度縮，可能收唔番錢。不過諗多無謂，少膽虫沙膽地按下了門鐘。「邊個？」一把熟悉嘅聲音傳來，一開門，少膽虫個口擘大到講唔到嘢。竟然係淫賤黎！

「少膽虫，你要守秘密呀！」淫賤黎哀求道，「咁缺德嘅事，講出去我無面見人！」少膽虫打蛇隨棍上：「得，畀番個老腫我咪得囉。」淫賤黎忙話：「得得得！只要你唔好同人講我劏房租畀人就得！」「吓？咁咋？」少膽虫奇道：「你唔係嚟尋歡咩？」「顧住撲水，得鬼閒咩！」淫賤黎悶悶不樂：「劏完呢度，仲要去劏台灣啲樓呀。」少膽虫恍然大悟，但係心入面諗住做番老腫，真係運吉人自有天相囉。