政壇：政商定格：希慎睇好舖租繼續升

做零售嘅，最緊要旺丁又旺財，希慎興業尋日喺利園一期搞咗個醒獅開市儀式，原來佢哋每年都會邀請唔同嘅租戶做點睛嘉賓，尋日都唔例外，而主人家就有希慎CEO劉少全同公司嘅高層。

公司商舖租務總經理Kitty蔡雯慧話，今年零售市道暢旺，希慎旗下嘅商場喺農曆新年期間（8號至14號）總共有逾十五萬嘅人次，相信喺咁強勁內地人同本港人消費帶動底下，今年零售市道都好樂觀，預期租金仲有機會繼續升添！劉少全就認為今年香港GDP有唔錯增長，加埋外圍市況喘定，對今年香港整體寫字樓市場審慎樂觀。