政壇：搞搞政：超級議員大挑戰 李慧琼一日走八場

身兼行政會議成員同立法會「超級」議員嘅Starry李慧琼，尋日出席一個酒會時講到農曆新年期間嘅工作量時，大呻做超級議員真係意想不到喺時間同體力上有好大挑戰，亦估唔到工作量會咁大，所以可能政府設計呢個選舉出嚟嗰時都評估唔到呢方面。不過，佢參選超級議員前，唔係預咗要咁忙嘅咩？

話時話，Starry可能真係失晒預算，因佢初時參選立會超級議席選舉時，或者諗住同黨友、現任政制及內地事務局副局長劉江華拍住上嘛，咁佢哋咪可以分工，一個負責香港、九龍嘅事務，一個負責新界事務囉。點知劉江華失落議席，Starry就要一腳踢走勻全港十八區囉。

以今次新年而言，佢話連續兩個星期日都要一日走八場團拜，就算平日都要每日走四、五場，香港、九龍及新界瓣瓣有佢份，簡直就係一個新挑戰喎。咁搞法，Wonder woman都捱到殘喇！不過，好彩佢早前休息咗幾日陪囡囡去大埔玩，否則就會畀愛女詐型喇。