政壇：長毛室內叼煙有相為證

話說政府尋日舉行新春酒會，社民連立法會議員「長毛」梁國雄都以議員身份出席，但入場就要着恤衫同打呔，佢為咗入場示威，都要屈服着番套正裝出席，打番條印有哲古華拉圖案嘅領呔。

社民連副主席吳文遠唔知係咪難得見到長毛着得咁型，即時用手機影低放上社交網站分享，仲要特登用英文寫咗「I am professional（我係專業）」。長毛前日同本身係大律師嘅建仔「男版蔣麗芸」馬恩國舌戰，吳文遠呢句疑似寸爆馬恩國以專業人士自居。

殊不知吳文遠此舉不經意揭發咗長毛叼住口煙，無視室內禁煙政策，有網民睇唔過眼出聲話要搵控煙辦投訴拉長毛。另有人則疑似為長毛開脫，話呢個可能係電子煙喎。姑勿論長毛有冇點燃支煙，定係真係電子煙，室內吸煙條例實施多時，佢喺情理上都講唔過去，如果最終寸人寸到惹禍上身，呢個真係自己攞嚟衰喇！