政壇：吳秋北爆珠姐開雞精班

港區全國人大代表同政協委員準備上京開會，作為人大新丁嘅工聯會理事長吳秋北尋日喺一個酒會上透露，有人特別為班新丁搞「雞精班」補習吓。

邊個搞「雞精班」？吳秋北話資深人大代表譚惠珠前晚同二十幾位港區人大食飯，珠姐席間教路點樣寫提案，仲爆料話當年有人喺閉門會議發言，點知最後被記者寫晒出街，原來有人擺放錄音筆偷聽，所以叮囑大家謹記發言時，要留意四周有冇錄音機，更加唔好幫手偷錄喎！

除咗港區人大外，連政協都有「雞精班」，全國政協委員盧文端就話，今個星期六會邀請一班新政協委員上堂，教佢哋要點樣睇工作報告。