孤寒財主不開庫 小心民望跌甩褲

新正頭，又到觀音開庫嘅日子，年年場面都好墟冚o架，簡直係人山人海。無計啦，香港窮人已經接近一百二十萬，官老爺扶貧又一味吹水唔放水，唔少市民左支右絀生活艱苦，咪惟有寄望神仙打救，打賞幾個發財錢囉。

市民要擺脫困境，除咗望天打卦，仲有更加積極嘅方法。嗱，尋日有大批市民祈願財源廣進，不過唔係求觀音開庫，而係要財爺曾俊華開庫，遊行請願要求月底預算案推出扶貧措施紓解民困。

遊行兵分幾路，分別由基層組織及政黨發動，不過宗旨都係一個，就係促請預算案開水喉濟貧扶困。除咗建議推出稅務寬免、電費補貼同寬免差餉，仲有人要求推行全民養老金，設立低收入家庭生活補貼，更有人建議直接向N無人士派錢，設立五百億元扶貧基金等等。總之，就係希望鬍鬚曾做番一次福為民開，唔好再做守財奴，搞到貧苦一族勒住褲頭過日子。

都話鬍鬚曾做庫房大掌櫃唔稱職o架啦，如果唔係，預算案前唔使搞到示威人潮絡繹不絕，政府總部仲墟冚過觀音廟啦。嗱，有遊行人士搞搞新意思，唔止要鬍鬚曾開庫，仲要佢剝褲，當場將一條代表鬍鬚曾嘅褲除落嚟，寓意還富於民。

做財爺做到畀人剝褲，鬍鬚曾都算丟架，不過都係咎由自取。預算案年年估錯數，換來一個「史上最廢財爺」惡名都算嘞，仲要年年做孤寒財主，市民生活艱苦都唔肯開倉濟民，點會唔畀基層怨到甩褲吖？

取之於民，用之於民，正如外界估計，港府財政儲備今年累積多達七千億元，庫房水浸到就快滿瀉，還富於民都好應該啦。市民借庫十億八億就話愛莫能助啫，家陣只係要求庫房打開一條小小門罅扶貧濟困，如果鬍鬚曾連咁都唔願做，除定褲啦，接受市民痛打八十大板！

時勢艱難，幫人即係幫自己。無錯，基層市民好多家徒四壁，不過鬍鬚曾唔好忘記，閣下同特區政府都係一個民望赤貧戶嚟o架，派糖紓解民怨咪當自我救贖囉，唔通你哋真係想民望跌破底線咩？尤其係施政報告出師未捷，批評不絕，如果預算案唔補鑊，港府民望隨時跌跌不休，到時神仙顯靈都救唔番啦！

一句講晒，預算案派糖惠民，鬍鬚曾救己助人。如果高官真係死性不改，睇住基層大眾水深火熱都無動於衷，得，等住民望跌到褲甩啦，叮！