SUN搞作：打橫嚟講：拉貪曾，大快人心！

貪曾雀屎煲呔被《東方》集團揭發其卑鄙貪腐行徑，足一周年矣！有關呢條粉腸豪遊馬交，搭香港富豪遊艇穿梭大海的付款問題，香港海事處查足一年後的回覆，話「涉事船東或船長沒有收取任何費用」，但煲呔卻在事發後，曾多次在立法會及傳媒面前公然聲稱已「按港澳渡輪船票市場價」，向遊艇船主科款五百大元作船費；咁！即係話，呢件仆街曾雀屎，唔只貪威識食愛小便宜，仲係無恥到砌詞狡辯，擘大眼講大話不特止，還推招待佢那個「老友」去死，叫人替佢擋刀，你話同呢啲人做朋友，係咪自己攞嚟賤吖？

有記者向「前任行政長官辦公室」查詢，嗰位「發言人」嘅答案，真冇得頂，佢回覆說：「曾先生於去年二月已多次向公眾、傳媒和立法會充分交代有關事實，（現在）並無任何補充。」識得睇新聞嘅人，每見政府官員的回應，凡有鑊氣賴嘢唔知點算扮死狗時的「默認」時，便會用上「不予置評」同「無補充」o架嘞！呢個打靶煲呔公然講大話，推諉叫人孭鑊，這是佢人格卑劣的表現，本與我哋無關，但香港海事處竟為那五舊水「船費」，要查足一年，工作能力是否低B弱能咗啲呢？好啦！貪曾又有搭佢老友的私人飛機到賭場夜宴，加埋其他林林總總的攞着數的，又要查幾耐呢？請問！

香港政府廢柴當道，今劑煲呔貪腐斷正，好應借勢立威立信，鎖Q佢去飲咖啡啦！全港無人想兩周年後，仲見到佢逍遙法外囉！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊（目及）實政府