SUN搞作：少膽虫手記：有鑊搵人孭

淫賤黎在香港開《喪報》例會時，特別叫埋《爛果》老腫，即係少膽虫本人，同編採人員入去訓話。淫賤黎話，依家《爛果》人又無，錢又無，人財兩失，一定要搵人孭鑊。少膽虫深明中國正值反右運動時，開會交人嘅時候，有啲人中途去廁所，返嚟就畀人劃為右派嘅歷史教訓，於是先下手為強，直指之前遞信要走嘅阿Kiss，力數佢不是，簡直講到佢係《爛果》呼風喚雨，搞三搞四，直頭勁過淫賤黎咁滯。其實，少膽虫咁做都係為班細嘅好，屈個將走之人，好過新年流流，全家富貴吖！完全唔係為自保，讀者唔好亂諗。

但係淫賤黎將信將疑，只係話：「有啲咁嘅人？我要見識吓！」阿Kiss剛剛由廁所返出嚟，先知畀我擺上枱。少膽虫即刻話：「阿Kiss，你咩都唔好講，我知你唔會認你做過嘅衰嘢！係唔係吖？你只需要答係定唔係！」阿Kiss答係又唔得，唔係又唔妥，唔知講咩好。「無聲出呢？你唔使講嘢，同我即刻扯！」少膽虫大嗌，只見阿Kiss聳一聳肩，開門要走。少膽虫心中暗喜，估唔到咁順利。

「是但啦，我有三十二分一嘅英國血統，最多咪返鄉下……」死仔阿Kiss竟然唔聽話，臨走都咁多口水。「等陣先！」淫賤黎大叫，「英國人一定好，一定係人才，少膽虫點解你會畀佢走？」少膽虫即刻見風駛舵，答：「阿Kiss份人係衰啲，但係佢寫嘢咁好，充滿文學性，喺度無得發揮，懷才不遇呀！」淫賤黎拍一拍大髀話：「阿Kiss，我畀你做主筆，你留喺度，寫咩都得！」「寫埋咩沙膽手記都得？」阿Kiss問。「得！梗係得！」呢個淫賤黎，答得好鬼爽。

「算啦，我依家前途無可限量，淫賤黎你都係慳啲，留番出糧畀呢啲蛀米少膽虫啦。」阿Kiss撥一撥佢嘅長髮，瀟灑地離開。淫賤黎悻悻然說：「《爛果》一定要改革！要留住人同財！」少膽虫竊笑，心諗革來革去，咪又係少膽虫做先鋒？