政壇：政商定格：徐子淇爸爸做佛聯顧問

香港佛教聯合會尋日舉行新春團拜，見到千億身抱徐子淇嘅爸爸徐傳順，佢誦佛號時雙手合十，唸唸有辭，好虔誠。原來佢拜佛逾二十年，師傅就係大名鼎鼎嘅永惺法師，而近日仲做埋佛聯會嘅名譽顧問添！

徐爸爸話自信佛後，心境祥和咗，煩惱都少啲。佢又盛讚佛學博大精深，閒來唔止鍾意睇佛經，每逢初一、十五，都會茹素。咁蹺親家「四叔」李兆基都鍾意講佛偈，難怪兩家咁啱傾嘞。

新正頭，徐爸爸仲同囡囡子淇及三名孫兒遊夏威夷，共聚天倫，但子淇留喺美國玩多一陣。問徐爸爸封幾多利是畀孫兒，佢就賣關子話：「象徵式喇。」

民政事務局副局長許曉暉一身紅噹噹唐裝嚟撐場，佢茹素二十年，初一全家食齋，兩個囡年紀輕輕已愛上食素，水果不離口。因食得健康，身材高人一等，連佢都嚇咗一跳，笑言食素原來可以增高。