政壇：政商定格：劉國勳想生個仔逗利是

北區區議員劉國勳同新界社團聯會理事Casta呂迪明結咗婚差唔多成年，今年農曆新年係首次派利是，劉國勳話唔知預幾多錢好，於是準備咗一萬蚊封利是，實行人人有份永無落空，但佢就呻話用晒啲錢嚟封利是，搞到過年都冇錢買新衫，淨係買咗對三百零蚊嘅運動鞋當係應吓節。佢又講笑話希望財爺鬍鬚曾喺月尾發表嘅財政預算案可以退番少少稅，等佢哋兩公婆可以幫補吓喎！

老婆Casta就投訴老公叫佢去「唱散」啲錢封利是，之後就乜都唔理，得佢同奶奶入利是入足成晚。Casta新年期間去親戚屋企拜年，收到最多嘅祝福不外乎係早生貴子嗰啲，但佢話至今都未有生仔大計。劉國勳開頭同老婆同一陣線，話生仔呢啲大工程都係順其自然比較好，但轉個頭又話生番個仔可以幫手逗利是，搞到老婆都唔知好嬲定好笑。