政壇：搞搞政：蔣麗芸傳授黨友獅吼功

建仔嘅立法會議員Ann蔣麗芸以獅吼功嗌一句「使唔使炒佢呀」迅速上位，但佢嘅黨友Starry李慧琼雖然做埋行政會議成員，但喺最近一次港大民調就只係排名十七，人氣升得慢咗啲。

文靜嘅Starry點至可以加啲辣，喺立會同阿Ann一唱一和？阿Ann雖然立會經驗比Starry少四年，但年紀比Starry大一截，佢二話不說就過兩招畀Starry，建議對方競步同唱卡拉OK，話兩個方法都可以練氣，特別係競步可以增強心肺功能，講嘢都可以大聲啲喎。Starry嘅回應仍然係好斯文，佢話周不時都同阿Ann觀摩互相學習，如果可做到剛柔並重就好嘞。

講嘢大唔大聲當然唔係夠唔夠氣嘅問題，夠氣講嘢都未必大聲。睇吓新一年Starry講嘢會唔會大聲啲，而阿Ann又會唔會收細聲量呢？不過，若果一個加大聲量，另一個又唔減低嘅話，兩個一齊用獅吼功，議事廳班議員真係有排震嘞！