政壇：陳南祿搭飛機唔怕「露罅」

早前一架由泰國飛往香港嘅A380客機喺二萬多呎高空飛行途中，機門離奇「露罅」吋半，雖然最後安全着陸，但已累乘客嚇餐飽。曾任職航空公司高層嘅恒隆地產董事總經理陳南祿因經常外遊及公幹，年中都搭唔少飛機。佢就話唔擔心飛機安全，事關綜觀飛機嘅失事率好低，航空交通遠比地面交通安全得多。佢分析，以飛機本身嘅設計嚟講，因機內外氣壓迥異，飛行途中機門肯定係唔會打得開嘅。佢話飛機同機師每年檢驗嘅次數頻密，汽車都未必驗得咁密，而且汽車只可以轉左或者右，而飛機則可上下左右移動，所以飛機嘅安全性都係較高。