政壇：立會健身室有怪味趕客

新立法會大樓五樓設有健身室，上屆唔少議員都鍾意去嗰度做運動，但今屆會期開始咗足足五個幾月，竟然冇聽過有議員話去喎，到底係班議員唔鍾意做運動，定係健身室突然「生人勿近」？

議會新丁Ben陳恒鑌解釋，班議員唔係唔鍾意做運動，而係健身室周不時瀰漫一股異味，搞到大家都唔鍾意入去。阿Ben話之前試過去跑步，但一行入去就有陣奇怪氣味撲面而來。佢做完運動後去健身室隔籬嘅浴室沖涼，但當佢沖完涼想用風筒吹頭時，竟然搵勻成個浴室都搵唔到插頭，惟有好無奈咁用跑步機隔籬嘅插頭。

阿Ben話見過鬼都怕黑，寧願去其他會所做運動。佢建議秘書處平日開大啲冷氣辟走怪味，或者將跑步機搬去戶外，等議員可以望住維港海景跑步，咁就唔使嘥咗啲地方喇！