政壇：施榮懷遊澳洲勁擦生蠔

廠商會會長Irons施榮懷喺農曆年假期，約埋兄弟同佢哋嘅屋企人，一行十九人去澳洲墨爾本享受七日南半球嘅新年，陣容鼎盛。Irons除咗陪姪仔、姪女去當地農場體驗剪羊毛、餵袋鼠同揸牛奶外，仲好識歎咁同兄弟去當地酒莊品酒，更一個人勁擦兩打生蠔添！

Irons喺網上大晒澳洲家庭樂嘅相，原來佢哋每年都會遊埠慶祝新年，繼上年去完澳門，今年就選址澳洲墨爾本。已經係第三次去澳洲賀年嘅Irons今次仲去咗菲臘島（Philip Island）睇企鵝同參觀十二門徒石添！雖然澳洲盛產紅酒，但佢就話紅酒並非至愛，威士忌先係佢杯茶，所以佢只係買咗少少白酒送畀朋友。