政壇：單雞收火變鵪鶉

白鴿黨立法會議員「單雞」單仲偕尋日喺屋企搞團拜，鍾意食嘢嘅佢一講起下廚就講唔停口，同平時喺立會唔多出聲形成好大對比。佢解釋，自己通常喺立會開會期間接見地區團體，發完言就要急急腳返上寫字樓開會，先會畀人誤會唔多講嘢。至於坊間普遍覺得佢重返立會後「收晒火」，佢就話自己行為既唔夠其他人激進，講嘢又唔夠人哋大聲，所以選擇行番溫和路線喎！唔知係咪暗示同黨主席劉慧卿嘅路線有衝突，口和心不和呢？

「冇人會同佢爭」

單雞之前同卿姐爭過做黨主席，初時大家以為佢坐定粒六，但最後都畀唔嫁又嫁嘅卿姐以十六票之差擊敗，搞到佢惟有退而求其次出任黨團召集人一職。雖則做呢個位，但換屆後唔少重大事務都由卿姐發言，單雞就好似退居幕後咁隱晒影。被問到覺唔覺卿姐搶晒自己啲嘢嚟做時，佢先定一定神，之後就用酸溜溜嘅語氣話：「佢鍾意講咪由得佢講囉，冇人會同佢爭。」

究竟係佢唔同人爭，抑或係冇得爭？只有佢自己知道。但原來私底下單雞好鍾意同老婆爭。講嘅係爭住下廚，但單雞並唔係捲高衫袖親自煮，而係企喺老婆隔籬教佢點煮。佢話近來鍾意睇YouTube學煮餸，中西式乜都整勻咁滯，嚟緊想學整麵包同西班牙菜。

單雞又話喺美國讀緊書嘅兩個仔將同時喺五月畢業，會先喺五月中飛去波士頓參加細仔嘅中學畢業禮，返港十幾日後又飛去華盛頓出席大仔嘅大學畢業禮。佢仲話讀環球商業管理嘅大仔已獲紐約一間投資銀行錄用，而細仔已獲得科羅拉多州一間大學取錄讀生物力學添！