唔怕估錯數 最怕守財奴

好咯，好咯，市民唔使被迫睇港產官僚無聊嘅宣傳騷，受疲勞轟炸咯。

財政預算案就快公布，近年每逢呢個時候，財政司司長曾俊華一定做場「大龍鳳」過足戲癮。出完漫畫出視頻，一時扮「攝青鬼」，一時用鬍鬚做道具，一時又搵明星Jam歌，花款多多，肉麻當有趣，核突當時髦，浪費公帑，不知所謂！

可能畀人炳得多啩，鬍鬚曾終於知衰，今年唔再玩埋啲古靈精怪嘅宣傳騷，慳錢仲係其次，最緊要大家樂得耳根清淨，唔使睇埋呢啲爛Gag！

不過咁，騷可以唔做，但嘢一定要做。今次係現屆政府首份財政預算案，扶貧紓困方面一定要攞出切實可行措施，如果再把錯脈，估錯數，出錯招，隨時引發民怨大爆炸o架。

講到估錯數，鬍鬚曾早就出晒名，佢斷估冇辛苦，年年都話有赤字，結果年年都有盈餘，而且愈錯愈離譜，唔到你唔服。

嗱嗱嗱，今年又係咁。多家會計師行普遍預測，今個財政年度政府盈餘最少超過五百億元，有人甚至估計多達八百億元添，同鬍鬚曾原本估計嘅三十四億元赤字，簡直差天共地，「估錯王」果然名不虛傳。預算案變「失算案」，鬍鬚曾年年叫狼來了，而庫房就年年錄得盈餘，其誠信唔止歲歲赤字，直頭破晒產喇，叮！

當然，估錯數只反映鬍鬚曾數學差理財能力低，問題唔係好嚴重，最緊要唔好做守財奴，要識得善用盈餘扶貧紓困，否則，錯上加錯，咁就無藥可救嘅喇。講真，施政報告齋噏願景，遠水難救近火，早已怨聲載道。家陣庫房豬籠入水，如果預算案又冇料到，只會令市民更失望，社會矛盾更深，施政更加舉步維艱嘅咋。

「空談誤國，實幹興邦」，今時今日連內地都提倡做實事，港府又豈能例外。點樣做實事？好簡單啫，還富於民咯，派錢又好，退稅又好，減差餉又好，總之最緊要做到公平公正，人人有份。除此之外，仲要識得利用龐大嘅財政盈餘，針對貧窮同安老等問題，制訂長遠嘅政策，呢啲至係政府最應該做嘅實事吖嘛！

本報記者農曆年前去黃大仙求籤問卜，民生求得「莊周活鮒」。計太一叮話齋，如果財爺再唔放活水，民怨乾柴隨時燃起沖天大火，到時連個天都救你唔到o架，叮！