SUN搞作：少膽虫手記：少膽虫睇相

少膽虫逗咗幾日利是，盆滿缽滿。不過以隻虫嘅貪心性格，梗係繼續走偏門，尋日條虫就去廟街睇相，諗住新一年擺番個陣，但求「坐直升機」做老腫。算命師傅一見少膽虫，即謂：「先生，貧道志向指點眾生。我不欲隱瞞，我擺檔廿年，都未曾見過狀若閣下嘅異稟！」少膽虫又驚又喜，梗係即刻追問，師傅不徐不疾補多句：「閣下天生一副虫相！我諗你以往嘅人生，吮癰舐痔，乜都做齊，係咪？」

少膽虫唔明咩叫「吮癰舐痔」，但係為咗掩飾自己嘅無知，就索性扮明，「係，師傅，我一直以『吮癰舐痔』為樂，請你指點我點樣可以係公司升職加人工……」師傅搖頭，「人窮志不窮，時窮節乃現，係一個人應有嘅堅持。我唔知你做邊行，但係一切垃圾，請敬而遠之；所謂擦鞋，請保留道德。先生，回頭路未遠，做番一個人，好過做條虫。」少膽虫聽君一言，個心砰砰跳！呢位師傅確實係高人，佢竟然睇得出少膽虫一直擦鞋上位。然後少膽虫又諗，《爛果》總部係堆填區隔籬，自己日日與垃圾為伍，師傅咁都知，真係如獲至寶！

少膽虫唔放過追問嘅機會，「師傅，咩先叫做番個人？我有成堆化骨虫要養，暫時都未可以遠離『垃圾』……」呢刻，師傅睜開佢嗰雙好似可以睇通一切嘅眼睛，望住少膽虫講咗句，「還原你嘅本心，搵番你當初嘅堅持。我可以講嘅得咁多，來日有緣，當你由虫變番人，我哋自會再聚。」

少膽虫懷住忐忑不安嘅心情返屋企，一路上，佢諗返起做新聞廿年嘅辛酸、入行嘅堅持，點滴在目、言猶在耳。少膽虫何嘗唔想改變香城，But we are the 99%，入行之後，少膽虫好快就發現佢只係一個扯線公仔，呢刻，隻虫不禁流下虫兒淚，係條街度唸唸有詞，「我唔想o架，我何嘗無理想？我唔想做一條虫，點解要逼我……」