SUN奇古怪：Sun潮語【辣妹】

「辣妹」呢個詞本身唔算潮語，因為喺台灣及華語地區，「辣妹」呢個稱謂已經用咗好多年。但最近喺香港，有個相當惹火嘅「潮州辣妹」，「潮州辣妹」係邊個？佢咪就係成日組織撐政府遊行嘅組織「愛護香港力量」嘅旗手，陳淨心女士是也！呢個甚有潮州辣味嘅中女，最近上港台節目舌戰群儒，面對立法會議員長毛梁國雄，同政治神童黃之鋒，針鋒相對。睇佢用文革式廣州腔口，批鬥長毛等反對派，仲大言不慚炮轟港台搞港獨，面對鏡頭仲唔小心疑似爆粗！嗰種大牌檔式嘅街坊論政邏輯，結合建制派黨八股階級鬥爭思想，真係令人大開眼界！令到「辣妹」重新成為熱話。

「辣妹」呢個潮語應該最先係嚟自台灣，最初用嚟形容一啲打扮性感兼態度十分火辣辣嘅女仔。因為英文係用「Hot」嚟形容呢種女仔，英國樂隊「Spicy Girl」，即係碧咸嫂Victoria都係成員之一嗰隊，其實意思就係「hot girl」咁解。台灣人就將「Hot」譯作「辣」，以致有 「辣妹」呢個稱呼。其實香港都有段時期用過「辣女」呢個詞，不過唔算太流行，因為港式粵語有個更簡單嘅「索」字嚟形容呢種性感女性。

時至今日，「辣妹」唔止形容外表，有啲性格火爆潑辣嘅女性都可以叫做「辣妹」，而年齡層亦由十八廿二嘅「妹」級上調至中女。如果你唔介意，你叫白鴿黨主席卿姐做「辣妹」都得，相信佢亦唔介意，不過我介意。講番「潮州辣妹」，希望佢可以自我檢討一下，佢好歹都係支持政府嘅代表，咁嘅態度唔會對現屆政府嘅民望有任何建設性嘅效果。畢竟呢個世界，唔係個個都食得辣，仲要係咁重口味嘅辣，真係唔好預我。