政壇：搞搞政：港台亂咁嘟被促道歉

日前都講過，香港電台播出嘅電視節目《議事論事》火藥味濃，獲邀出席立法會議員「長毛」梁國雄，當場質問有「潮州辣妹」之稱嘅愛護香港力量發言人陳淨心係咪建制派，結果惹來陳淨心爆出一句「我係咪建制派關你叉事？」不過，港台就煞有介事將個「叉」字以「嘟」一聲蓋過，令外界誤會陳淨心爆粗。

事件擾攘至今，連立法會前議員潘佩璆都睇唔過眼，喺社交網站留言，強調事實非常清楚，係潮州辣妹喺節目中只講過「關你叉事」。佢話呢個「叉」字既非不雅，又唔係粗口諧音，況且香港一般年輕人都好常用呢四個字，相信搵粵音專家何文匯博士都唔會評為粗言穢語喎。佢形容陳淨心係一位「年輕女士」，港台咁做法確實會損害當事人聲譽，應該鄭重道歉。咁即係話港台亂咁嘟喇，港台台長鄧忍光收到未呀？