政壇：范太寸CY去信《信報》不智

《信報》主筆練乙錚撰文話特首CY梁振英「涉黑實可雙規」，引發CY向《信報》發律師信，《信報》要發出道歉聲明平息風波。全國人大常委范徐麗泰尋日出席一個活動時話法律面前人人平等，所以無論特首或市民都可透過法律提出訴求。不過，范太形容練乙錚嘅文章曲高和寡且頗長，相信好多市民未必會睇過，但依家反而喺網上廣泛流傳，莫非范太暗示CY去信《信報》嘅做法不智？

講到鄉議局主席劉皇發年初二為香港求得嘅下籤提及「慎防小人」，范太就話社會總有好人同小人，做事對香港有利嘅就係好人，對香港冇利嘅就係小人，所以佢一時間都睇唔清喎。不過，佢又話外部勢力先係小人都未定，例如歐洲財政危機、日本或北韓局勢等，都可能會影響到香港，咁咪即係小人囉，所以凡事都係要謹慎小心。至於政府，范太話不論面對民望高低，都應努力去做，民望低就可以當係努力做事嘅原動力，所以唔使太擔憂喎。