政壇：鄭承隆五千元息車牌風波

本報尋日報道運輸署同日舉行嘅自訂車牌拍賣中，車牌「CSD HK」因非常近似懲教署英文縮寫而引起該署人員不滿，要求停止拍賣該車牌，甚至揚言到拍賣會場示威。不過，呢場風波最終大團圓結局，都係多得身兼新民黨副主席嘅仁濟醫院主席Edwin鄭承隆。

Edwin透露，雖然佢同懲教署署長單日堅好老友，但投車牌前並冇溝通過，佢都係睇完本報有關報道先知件事，由於佢係懲教署社區參與助更生委員會委員，同懲教署稱得上有淵源，擔心「CSD HK」車牌一旦流入市面，有乜事發生就會影響懲教署形象，於是決定以個人名義為懲教署「投其所好」喇。佢仲話估唔到車牌以底價五千元成交咁抵，目前仍未決定點樣處理個車牌，但會同懲教署體育會商討點做，希望喺一年後牌照期屆滿時唔再續牌，將車牌交還政府。