政壇：發叔下籤當上籤

尋日係人日，新界鄉議局按照慣例喺呢日舉行新春團拜，署理特首林鄭月娥率領多名政府官員出席外，逾十名新任港區全國人大代表同政協委員都嚟捧場。

鄉議局主席劉皇發年初二喺車公廟為香港求得九十五籤下籤，籤文解曰：「宜慎小人，凡事不利」，連日來令外界議論紛紛，但發叔尋日就自爆，其實佢一直以為九十五籤係上籤，點知到咗解籤師傅解籤時，佢先知道係下籤喎！吓！唔係啩？

點解發叔對九十五籤咁有印象呢？莫非佢有預感會求得九十五籤？抑或佢以前求過呢支籤，有人點佢話係上籤呢？不過，喺九十六支車公靈籤入面，只有十七支係下籤，咁都畀發叔求到，又難怪有人質疑發叔係咪使出求籤秘技整蠱特首梁振英。之不過，發叔就誓神劈願話求籤冇造假，佢一如以往，喺求籤當日早上七點起床，沐浴更衣，再出發去車公廟，肯定係有誠心祈禱去求籤喎！

小水龍象徵變更

雖然求得下籤，但發叔喺致詞時講到今年係水蛇年，而蛇又有小龍之稱，對比往年嘅亢龍，小水龍可視為調整變更嘅象徵。佢話面對過去一年嘅政治爭拗，政府同市民都覺得煩厭，所以如果大家調整心態，以「皆大歡喜」之心取代鬥爭及黨同伐異勢不兩立之心，局面便會變得和諧清明……一定會趨吉避凶、轉危為機喎。簡單一條水蛇都畀佢發揮到咁和諧，薑果然係愈老愈辣，後輩們真係要學吓嘢喇。