遊客無助吊吊揈 旅業醜聞何時了

阿珍出沒注意！阿蓉出沒注意！新春旺季旅遊業又爆醜聞，今鋪唔係毒舌導遊喪鬧遊客，亦唔係兇悍領隊狂毆團友，而係無良旅行社狂「賣豬仔」。

內地一個旅行團年初三抵港，行程安排混亂已經夠掃興喇，居然連酒店都冇得住，焗住留喺旅遊巴過夜，導遊仲一度唔見人添。團友多次報警求助終於獲安排住宿，但第二日朝早瞓醒覺竟發現導遊已「潛水」返內地，旅行團被迫解散，團友吊吊揈，搞到要自費繼續行程。歡歡喜喜來港度歲，結果畀人賣豬仔，慘過走難，有團友形容香港之行係「由天堂跌落地獄」，發誓永遠唔會再嚟。旅遊業議會例牌賊過興兵，聲稱旅行社嘅做法嚴重違規，不能接受喎。

唉，不能接受又點吖，你話不能接受，佢就不斷發生。呢，衰開有條路，尋日另一個內地旅行團又要喺旅遊巴過夜。旅遊業議會話就話會調查跟進，但連爆兩單醜聞，香港乜架都丟清光喇，仲話係旅遊之都添，簡直笑死人！

有資深業內人士踢爆，問題皆因監管甩漏所致。近年有內地旅行社利用個人遊政策出蠱惑，請港人掛名開旅行社，自己喺幕後操縱，由內地招客、香港接待、購物安排一條龍全包。呢啲所謂旅行社專做內地廉價「散拼團」，爭生意不擇手段，租房靠「博」酒店賣剩蔗嘅廉價房，旺季隨時要瞓街。最牙煙就係，呢類旅行社完全唔顧商譽，衰咗執笠換個牌再嚟過，而且背後有專做遊客生意嘅珠寶店「照住」，有客齊齊劏。

唔怪得喇，今次呢個豬仔團每人畀千幾至二千幾蚊，包食包住玩足幾日，邊有咁大隻蛤乸隨街跳吖，擺明係變相購物團喇。以低團費甚至「零團費」做招徠嘅購物團，改頭換面死灰復燃，而政府仲矇查查，唔知究竟係後知後覺吖，定係渾渾噩噩。

香港話就話有旅遊事務署、旅遊發展局同旅遊業議會，弊在各自為政，互相卸責，三個和尚冇水食，乜都做唔到。港府聲稱要成立「旅遊業監管局」統一規管旅遊業，點知依家仲係只聞樓梯響，唔知幾時成事。咁拖法，旅遊業有乜法子唔亂吖。

講開又講，近年開放個人遊嘅城市不斷增加，訪港旅客愈來愈多，而本港配套設施就冇增加到，尤其係酒店房間嚴重短缺，想唔出事都幾難喇。

遊客無助吊吊揈，旅業醜聞何時了。旅遊業係本港經濟支柱之一，當局監管不力，助長業內歪風，簡直自毀根基，如果連呢條支柱都冧埋，香港隨時玩完嘅咋，叮！