SUN搞作：打橫嚟講：阿爺出招，問你哋點頂！
近日有團體話希望能替那些沒有回鄉卡的港人爭取攞番張卡，當然，言中所指「無卡用」的人，係被視為「搞事反對派」的香港泛民或民運分子啦！
而重中之重，主要對象應是有議席的民選議員，而那些高叫結束一黨專政的支聯會成員，不在視線之內囉！
只要稍有知覺的港人，皆會睇到有啲人一直以來的行事模樣，沒有阿爺吹雞，佢哋怎敢「自把自為」、「獨行獨斷」？佢哋何來膽量，甚或自由主意去做嘢吖！尤其是有關政治之事宜，除了那些狐假虎威、私相授受的勾結外，一切收買籠絡、分贓酬庸、派餅統戰，都定必是接旨執行任務的！
頭領高調出口術，調侃寸爆北京政府夠薑面對英美外國勢力，哪須怕呢啲小蟻民？講到港獨，台灣民進黨的謝長廷都放佢入口，「做乜鬼唔畀回鄉卡人哋啫！」一邊偷看貓紙唸稿，一面風騷的「接受」友好電視台的「專訪」，此頭領如果能成功爭取泛民議員北上直接了解祖國的強盛和偉大，咁佢又立大功了！
嗱！被褫奪國民身份的「反對派」，一直以被沒收了回鄉卡為政治本錢，指中國政府違反人權，好啦！現今如果真的無條件之下還你哋回鄉權利，點算呢？有若剝下你哋個護陰，再兜心窩一拳落死穴裏，看你班庸才點接招？
長期被取笑為政治娃娃的無卡用議員們，今次考牌了！睇你哋的政治智慧啦！
次文化考古學家，對城中潮語有深入研究，博徵博引，廢官廢人行埋一邊。
