SUN搞作：少膽虫手記：理財貼士

新年派利是呢，做得主管嘅都頭痕，而喺《爛果》做老腫，就更加頭都痛埋。看官唔好以為做老腫好風光，見我成日講股講樓，其實交交埋埋唔少學費，仲邊有閒錢封利是先得o架？好彩少膽虫返工一見到大門口佛利民海耶克個樣，即刻重燃獅子山下精神，努力向上，叮一聲，就畀少膽虫諗到條橋。

條橋好簡單，就係開源節流喇。唔好以為又係廢話，你知理論嘢好多人講到天下無敵，日日都有個專欄畀佢，但係一做就全身乏力。少膽虫就唔同喇，一諗到橋就做。點做？有橋，梗係去搵社長「懵橋」啦。搵社長做咩？梗係開源啦！須知搵社長唔係好似三顧茅廬咁，兩三丁友就去得，要吼準一大班人，三唔識七，混入其中，見來者面容慘淡，毫無血色，就知是派利是派到大出血，此時再一舉圍殲，必有斬獲！少膽虫就在人群中欺身過去，從社長手上連環取去紅噹噹嘅幾十封，再矮身由人群褲襠中穿出，全程不露面，華麗退場。少膽虫正值沾沾自喜之時，忽然聽見：「老腫！幾日都唔見你，乜你都喺度嘅？」原來少膽虫嘅身法，fing春宗師蘇哥全看在眼內。蘇哥不懷好意咁喺少膽虫耳邊話：「恭喜發財！恭喜發財！」

大家以為少膽虫一定係守財奴，唔畀利是佢啦？錯！少膽虫仲畀咗一半利是！因為少膽虫畀呢舊錢佢，係就係有支出，但係穿咗出去，連嗰一半都無埋。呢個就係活用開源節流嘅奧義！

少膽虫