政壇：政商定格：恒生義工織冷帽惠長者

恒生銀行零售銀行及財富管理業務主管陳力生早前聯同三位女高層，再加埋過百個恒生義工，用咗超過三千粒鐘，織咗五百條冷頸巾同二百頂冷帽，到社區服務中心親手送畀七百位老友記，等班老友記過一個暖笠笠嘅春節。除咗有愛心溫暖牌收，幾位高層同一班義工仲同老友記大玩遊戲添！

其實恒生一直都愛心爆棚o架，佢哋嘅義工隊周不時都搞吓活動，好似成立咗支愛心剪髮隊幫老友記剪頭髮、又為老友記準備一餐特別嘅中秋午膳咁，而且仲安排一啲基層嘅小朋友到唔同景點參觀、同搞吓「惜樹教育大使」計劃宣傳樹木保育呀咁。