政壇：搞搞政：嫻姐推動「瞓天橋底」

政府講過房屋問題係重中之重，首要任務係覓地建樓。立法會議員陳婉嫻尋日約傳媒喺天橋底見面，宣布同中大建築學院副教授鄭炳鴻同文化人胡恩威成立民間組織「天橋底行動」，專門研究天橋底發展，頭炮係建議政府將觀塘繞道一段天橋底列作試點，用作舉辦文化活動，仲可以開吓演唱會添！

佢哋話香港對發展天橋底嘅概念相當落後，事關北京、紐約等地都有發展天橋底嘅先例，而全港有一千二百條行車天橋，近七百條行人天橋，可見發展潛力無限。

講到最爆嘅係佢哋為「瞓天橋底」正名，建議政府喺天橋底放置貨櫃，作臨時房屋或者青年旅舍之用。嫻姐一邊望住觀塘繞道對開嘅海濱，一邊讚嘆環境唔係好差，至少夠通風，比起住劏房同「棺材房」好吖！跟住又話雖然天橋底喺嘈啲，但對岸東區走廊海旁都有人住，仲爆出一句：「如果你住過城市花園就會知道，嘈過佢（天橋底）十萬倍！」講到天橋底環境咁好，唔知佢有冇諗過身先士卒搬去天橋底住吓呢？