政壇：陳淨心疑似爆粗鬧長毛

香港電台上星期錄影《議事論事》，當時有組織喺錄影廠外爆發衝突，但估唔到連錄影廠入面都火花四濺。為咗響應議題「議會內外分化」，港台喺錄影廠內放置咗中國國旗、特區區旗同港英旗，有「潮州辣妹」之稱嘅愛護香港力量發言人陳淨心就面燶燶質問港台係咪支持港獨，又鬧爆監製插支旗出嚟想誤導市民，令市民誤以為港獨議題有討論空間，節目主持即時澄清港台豎立嘅係殖民地時代嘅港英旗，而唔係港獨旗。

社民連「長毛」梁國雄加入戰團，話可惜香港冇中宣部，但佢未講完，陳淨心發晒茅話佢嘅言論踐踏中國人嘅尊嚴，問佢「會唔會搵人去CNN講加州獨立」，仲索性指住話佢「簡直唔係人」。幾分鐘後，陳淨心話自己參加撐梁遊行係因為睇唔過眼有啲議員成日掟嘢，為反而反，阻住政府做嘢。

長毛就反寸陳淨心「係政權嘅一條狗」，又問對方係咪建制派，逼到陳淨心疑似爆粗回敬：「我係咪建制關你×事？」當時兩個主持你眼望我眼，唔知講乜好，惟有轉問蔣麗芸會唔會參加撐梁遊行。