政壇：搞搞政：CY批八字蛇年難過

尋日我哋講過部分立法會議員嘅蛇年運程後，今日輪到為一眾高官批算，部分官員運程就認真麻麻喇！

香港術數家協會術數師楊子東話，特首CY梁振英上任至今七個多月，爭議問題不絕，呢個困難局面將延續至蛇年，事關從CY八字中嘅年、月、日三柱睇到，「CY大運戊寅，火生旺戊土，忌神出現，更加難展現才華」，所以蛇年「難有難過」，農曆正、二月勉強過到，五、六、九呢三個月不順，尤以七、八月最差，要去到冬季才平穩。但到二○一四年甲午年，CY生肖伏吟，到夏天「土旺」難題更多，甚至出現更大危機。

政府視解決房屋問題為重中之重，有份參與建屋大業嘅運輸及房屋局局長張炳良蛇年運程未許樂觀，皆因佢「官星大波動」，農曆七、八月「必有負面大事」，到農曆十一月會更差。同樣運程麻麻嘅仲有環境局副局長陸恭蕙，楊師傅形容佢「遇強更強」，農曆三、四月平穩中帶憂患，之後農曆五、六月「必有大震撼」，冬季農曆十、十一月更有「大難關」，幾乎個個月都有事發生。都係嗰句啦，八字運程嘅嘢「信則有，不信則無」。